რა უნდა ვიცოდეთ თუ ლიფტი გაიჭედა?

ლიფტის გაჭედვისას, ბუნებრივია, პირველი რეაქცია შეშფოთებაა. სინამდვილეში, ეს პროცესი თავისთავად საშიში არ არის. თანამედროვე მოწყობილობები რამდენიმე დამოუკიდებელი უსაფრთხოების სისტემით არის აღჭურვილი და კაბინის ვარდნის ალბათობა პრაქტიკულად ნულს უტოლდება. 

პრობლემა, როგორც წესი, მაშინ ჩნდება, როცა ადამიანი პანიკის გავლენით არასწორად იქცევა. ამ ბლოგში განვიხილავთ,  როგორ მოვიქცეთ თუ ლიფტი მწყობრიდან გამოვიდა, რა ქმედებებს უნდა მოვერიდოთ და როგორ შევამციროთ ასეთი სიტუაციების რისკი.

რატომ იჭედება ლიფტი?

გაჭედვის მიზეზები მრავალფეროვანია. ყველაზე ხშირი ელექტროენერგიის გათიშვაა. ამ დროს მოწყობილობა ავტომატურად ჩერდება და უსაფრთხო მდგომარეობაში გადადის. 

მეორე გავრცელებული მიზეზი კარის მექანიზმის გაუმართაობაა: სენსორმა შეიძლება, საგანი აღმოაჩინოს იქ, სადაც რეალურად არაფერია, ან მექანიკურმა ნაწილმა ცვეთის გამო შეწყვიტოს გამართულად მუშაობა.

ასევე არის შემთხვევები, როცა ტვირთამწეობის ზღვარი გადაჭარბებულია – კაბინაში უფრო მეტი ადამიანი ან ტვირთია, ვიდრე დასაშვებია, რაც სისტემას აჩერებს. ზოგჯერ მიზეზი მართვის ელექტრონულ სისტემაშია: პროგრამულმა შეცდომამ ან სენსორის გაუმართაობამ შეიძლება, ლიფტი სართულებს შორის გააჩეროს.

მიზეზის მიუხედავად, მთავარი ისაა, რომ ეს სიტუაცია დროებითია და მას კვალიფიციური სპეციალისტი მოაგვარებს.

როგორ მოვიქცეთ ლიფტში საგანგებო სიტუაციების დროს?

პირველ რიგში, შეინარჩუნეთ სიმშვიდე. ეს ყველაზე მნიშვნელოვანი ნაბიჯია. კაბინაში ჰაერი ვენტილაციის სისტემით მუდმივად ცირკულირდება, ჟანგბადის ამოწურვის საფრთხე არ არსებობს. ახალ ლიფტებს რამდენიმე დამოუკიდებელი სამუხრუჭე სისტემა აქვს, რომლებიც ელექტროენერგიის გარეშეც მუშაობს. კაბინა ვერ ჩამოვარდება – ეს ფიზიკურად შეუძლებელია იმ მექანიზმებით, რომლებითაც დღევანდელი მოწყობილობებია აღჭურვილი.

• გამოიყენეთ საგანგებო ღილაკი. ყველა ლიფტში არის ავარიული კავშირის საშუალება – ღილაკი, რომელიც პირდაპირ უკავშირდება სერვის-ცენტრს ან შენობის უსაფრთხოების სამსახურს. დააჭირეთ ამ ღილაკს და მოკლედ აღწერეთ სიტუაცია: სად იმყოფებით, რამდენი ადამიანი ხართ კაბინაში და აქვს თუ არა ვინმეს ჯანმრთელობის პრობლემა.

• თუ საგანგებო ღილაკი არ მუშაობს, გამოიყენეთ ტელეფონი. დაურეკეთ შენობის ადმინისტრაციას, სერვის-კომპანიას ან საგანგებო სამსახურს. აცნობეთ მათ შენობის მისამართი, ლიფტის ადგილმდებარეობა და, თუ გარჩევა შესაძლებელია, სართულის ნომერიც. ტელეფონის ბატარეა გონივრულად ხარჯეთ – თავი შეიკავეთ ზედმეტი ზარებისა და შეტყობინებებისგან.

• დაელოდეთ კვალიფიციურ სპეციალისტს, რომელიც კაბინას უახლოეს სართულზე გადაიყვანს ან კარებს უსაფრთხოდ გახსნის. 

რა არ უნდა გააკეთოთ?

ყველაზე საშიში ქმედება კარების ძალით გაღების მცდელობაა. შეიძლება, ფილმებში ხშირად გინახავთ, როგორ აღებს გმირი კარებს ხელით და გამოძრომასაც კი ახერხებს, მაგრამ რეალობაში ეს სიცოცხლისთვის საშიში ქმედებაა. თუ კაბინა სართულებს შორისაა, ადამიანი შახტის ღია სივრცეში ხვდება, სადაც ვარდნის საფრთხე მაღალია. ამავდროულად, ლიფტმა შეიძლება ნებისმიერ მომენტში განაახლოს მოძრაობა.

ასევე არ უნდა ახტეთ ან შეარხიოთ კაბინა. ეს სიტუაციას ართულებს. არ სცადოთ ჭერის ლუქით გაძრომა. ის საევაკუაციო გასასვლელია, მაგრამ არა მგზავრებისთვის, არამედ მხოლოდ სამაშველო ჯგუფისთვის. 

რამდენიმე ღილაკზე ერთდროულად დაჭერასაც მოერიდეთ. ეს სისტემას არ აღადგენს, პირიქით – მართვის ელექტრონიკას არევს და აღდგენის პროცესს შეაფერხებს.

როგორ შევამციროთ გაჭედვის რისკი?

• გაჭედვის შემთხვევების უმეტესობა პრევენციულად აცილებადია. პირველ რიგში, ყურადღება მიაქციეთ ტვირთამწეობის ზღვარს –  კაბინაში მითითებულია მაქსიმალური წონა და მგზავრთა რაოდენობა. 

• არ შეეცადოთ კარის შეყოვნებას ხელით ან ტანით. გამოიყენეთ გაღების ღილაკი. მექანიზმის ხელით ბლოკირება ცვეთას აჩქარებს და შემდგომში ლიფტის გაჭედვის ერთ-ერთი ხშირი მიზეზია.

• ხანძრის, მიწისძვრის ან ელექტროენერგიის გათიშვის დროს ლიფტით სარგებლობა დაუშვებელია. ასეთ შემთხვევაში გამოიყენეთ საევაკუაციო კიბე.

შენობის მფლობელებს კი უნდა ვუთხრათ, რომ რეგულარული ტექნიკური მომსახურება ხარვეზებს ადრეულ ეტაპზე გამოავლენს. მცირე პრობლემაც კი, თუ დროულად არ გამოსწორდება, ჯერ ხშირ გაჭედვას გამოიწვევს, შემდეგ კი სერიოზულ პრობლემებს. 

CLC Elevator: ტექნიკური გამართულობა ჩვენი პასუხისმგებლობაა

ლიფტის გაჭედვა ხშირ შემთხვევაში არა მოულოდნელობა, არამედ ტექნიკური მომსახურების ნაკლებობის შედეგია. რეგულარული შემოწმება, დროული პროფილაქტიკა და გამოცდილი სპეციალისტის ჩართულობა იმის გარანტიაა, რომ მოწყობილობა საიმედოდ იმუშავებს.

CLC Elevator სრულ მომსახურებას ახორციელებს: ახალი მოწყობილობის მონტაჟიდან რეგულარულ სერვისამდე და ტექნიკურ ინსპექტირებამდე.

თუ თქვენი შენობის ლიფტი რეგულარულ მომსახურებას საჭიროებს ან სერვისის შეცვლაზე ფიქრობთ, ჩვენი ტექნიკური გუნდი ადგილზე შეისწავლის მოწყობილობას და კონკრეტულ რეკომენდაციებს მოგცემთ.